بياع جرايد
سعد صاحب
طفل يفتر بالشوارع .. طفل واكف بالتقاطع
طفل شايل بيده صفطه من الجرايد
صفطه مشرق.. صفطه بغداد وتآخي
صفطه اسماء وعناوين وتجارب
صفطه درب الشعب واحد!!
وانه ونتي والطفل والناس شباج ونفانيف ومراحب
والشعب رغم الحزن للعيد كاصد
والجرايد..،
كل حرف منها مشاعل
كل حرف منها خمايل
كل حرف منها سنابل
كل حرف منها جدايل
كل حرف منها معاضد
كل حرف منها ملاوي..
كل حرف منها عصافير وقناديل ومواكد
كل حرف منها عجايب..
كل حرف يضوي على صدور الحبايب
وردة حمره ومستحة وشوك وكلايد
طفل رايع
طفل بين الناس ضايع
مره يتوسد على دروب الكنيسه
مرة بجفوفه يهز باب الجوامع
والليالي هواي صعبة
لوعطش يشرب نزيف جروح كلبه
ياكل خيوط الشمس لوجان جايع
.......
طفل تخجل حتى شمس الله تجيسه
طفل وسط جيوبه شايل..
برتقاله وليل وشواك ومناشير وكواكب
طفل عباد الشمس والنور حبه
طفل مثل العسل مايع.
*****
طفل واعد!
جن هلاهل وسط هاي الروح نازل
جن سواليف ومحبه
جن مشاوير وغناوي،
وغصن اخضر فوك سطح الروح صاعد.
طفل فوك امن الشمس فارش جريده
يقره للنواب آخر ملحمه وآخر قصيدة
ينتظر بغداد والدنيا الجديدة
ينتظر جودت على تلول الثلج واكف يصيح
عمية زرقاء اليمامة
وانه كلبي مصوب بطعنات حلوات الجهامه
ولسه يا وادم وكيح
ينتظر عطر المباخر
ينتظر ذيج المجامر
ينتظر جية البواخر،
فوك كل شراع نجمات وحمامه
فوك كل نجمه وهج راس الذبيح
ينتظر جبار لابس ثوب ماوي
ينتظر عودة ملاك الجنة كاعد.
هلبت يغطي نزيف جروح شاعر
لا تطيب..
ولاتسيل...
ولا تتوب..
ولا تشيح
ولا على الباكي العمر منها تناشد.
وانه لسه اعلى الدرب انطر الغايب
وانه ما واحد اخذ مني رسايل..
وانه خلان شكثر بالدينا فاكد.
وانه شدة ورد من ذيج الشمس للناس جايب
وانه تعبني هواك وهم اعاند.
ما اصيح..،
شما تذوبني النوايب
ما أصيح!
ما أصيح..،
شما تدولبني المصايب
ما أصيح!!
ما أصيح..،
شما تعذبني الشدايد
ما أصيح
شنهي نفع جفوف ما شالت اثر من السلاسل؟
شنهي لذتك يا عمر دون الشدايد؟
ما اطيح..،
وداعة عيون الاحبه
ما اطيح!
ما اطيح..،
وداعة الطاف اعلى كعبه
ما اطيح!
ما اطيح..،
وداعة المات على خشبه
ما اطيح!
ما اطيح .. وغير عينك ما اغازل،
ما اطيح .. وغير شمسك ما أجامل،
ما اطيح.. وغير جفك يا ترف لا ما اكاود
****
وانه شفت الدنيا ثوره
انه شفت الناس تقره
ما تمض بيهه الطلايب..
تشتم الريح وتوادد كل محب رايد يوادد.
بيهم يحب المناجل.. بيهم يحب الملاعب.
بيهم يحب الخواطر..
بيهم يحب القصايد
وانه صحت العيد يمعود تعال،
وانه بست الطفل وسألته سؤال،
عمي يا هو اكثر تبيع من الجرايد ؟
كال يا عمي اكلك بالحقيقة
كال يا عمي اكلك بالصحيح
ونتظرني بس دقيقة
رسمت دموعه الطفل ورده وحمامات وكصايب
وابتسم ورتاح كلبه الجان ذايب.
