الكابتن خيشة
__________
كان بيحاول يمسح كل خطوط الجلابية الكستور
ويدخل نُصَّهَا ف لباسُه عَشَان تبقي فَانِلة لَعِّيب
ويشِب ويتمَختَر
ويلَوِّن جزمة بَاتَا البيضا بالفلومستر
كان لما يشوف الكورة يقَشعَر
وينُط يسَخَّن ويصَفَّر
كات رِجلُه طويييييلة طوييييلة كإنه زرافة
وصوابعة بُوز أبريق
كورة المدرسة كات أصلي تجرِّي الرِيق
والحِصَّة بتِخلَص دايماً قبل ما ييجي
عليه الدور في اللعب
كان آخر واحد ممكن ياخدوه في فريق
فيشُوط يأسُه
ويفضل يلعب باقي اليوم مع نفسه
بالكورة الخلقان
المحشورة جوا شراب هَلْكَان
و يسِف تراب الجُرن
ويفضل طول الليل في الحلم يجيب اجوان
سعد سلامة
__________
كان أحسن واحد يعمل زُمَّارة من عود برسيم
ويعَدِّي الترعة ولا يقِبِّش
وينام ع التُوتة وعلي ضهر البقرة
ويساعد كل الناس في الزرع
والغُنا والدمع
والبُنَا والترمِيم
كان دايماً بيرَوَّح مجروح
بس بيعمل نفسه سَلِيم
فايزة الطافشة
_____________
طَفَشِت في القيَّالة ولا رِجعِتش
وفِضلِت موجودة ف حَكَاوِي الخلق
عن تهمة حرام او عشق حلال
عن تعب الدنيا و راحة البال
عن وَسَع العقل وضيق الحال
عن حكمة تبديل الأحوال
أمها ماتت م الحسرة
وابوها اتلفح بشوال
كل ما يلمح بنت..... يعيط
ويروح يسألها سؤال...........
عبدة الكلاف
____________
من مُهرة وخمسين سنة
كان عايش ف اسطبل العمدة
حافي.... وحاف
قايم نايم ويَّا الخيل
لا يشوف حد... ولا بيتشاف
وف مرة ف مولد سيدي زويل
مشي بالمهرة البيضا وبالنبوت
ورَمَح بيها بعيد ما رجعش
خلق يقولوا شبعان عيشة ف مركز تاني
وعنده أراضي ومال وبيوت
وخلق يقولوا شبعان موت
صابر هَمَّام
__________
كان بيقَطَّع من جسمه
ويدِّي ولاده
ويقطَّع من جسمه ويدي الفقرا
وبقطَّع من جسمه ويدي بلاده
ويقطَّع من جسمه ويدي الأيام
صابر مات
مالقوش ولا لحم ولا عظام
ف بنوا له مقام
