نصائح للابن الكبير
بوس راس الوالد و قل له مبروك
و افرح ببراءتك إنت و أخوك
شاور لمحاميك و انت مبتسم
و شوف الفرحة على وشه بتترسم
واقف بالروب بيولع سيجار
و أمهات قلوبهم مولع نار
طز مش مهم المهم انك بريء
اطلع و واجههم خليك جريء
ده انت اللي كنت عالحجر متدلع
تقوم لما تيجي تورثها - تولع؟؟؟
فعلا كات غلطة احنا آسفين
ضايقنا جنابك أربع سنين
مظلوم يا عين ماما، آه صحيح ازيها؟
نفسنا نروح نسجد عند رجلها
نبوس الأيادي عشان آن الأوان
رد الاعتبار لماما سوزان
و طمنا وحياتك عالشغل بتاع زمان
عايزينك ترجع تاني أحلى بزنس مان
و تصدير الغاز أهه طلع قانوني
زقطط و غني "اللي غاروا مني لاموني"
بابا ما طلعش قاتل و لا انت حرامي
هو زعيم وطني و انت راجل عصامي
القفص ده مش ليك ده لينا احنا العبيد
و قضبانه طلعت "صُنع عز للحديد"
"يا مفجر ثورة الشباب" فاكر اما قالهالك؟
دلوقت جه دور سعادتك تورثها لعيالك
من غير مافتح منديل أو اقرالك البخت
أكيد في حتة أرض على فيلا على يخت
أمن مستقبلك بسرعة و مستقبل العيال
زي ما شفت ما فيش حال بيفضل على حال
الدنيا تبقى في إيدك و تقسم لغيرك
معلش قرب منه خلى لحم كتافه من خيرك
هو انا اللي حاعلمك إن السياسة عايزة فلوس
ده انت أستاذنا و في الكلام ده ناخد منك دروس
برطع يا باشا و فرشخ و سيبك من الإعلام
بكره يجروا وراك و يدفعولك تمن الكلام
ارمي كله ورا ضهرك ده انت صبرت كتير
محاكمات و زنازين عشان حتة شعب حقير
لا يا باشا مش انت، ما تستاهلش كل ده
ده انت و بابا فوق روسنا و احنا ليكم فدا
و اللي ماتوا في داهية ما هما اللي افتروا
مش لدنيتهم باعوا و آخرتهم اشتروا؟
قول لامهاتهم "روّحوا حق ولادكم مش هنا
و اللي عايز مننا حاجة يطلبها من ربنا"
ارفع راسك فوووووق ده انت سيد الناس
و احنا اللي نستاهل بالدبابة ننداس
اطلع و انت مطمن و ما تخافش من التخين
وافتكر ده مش حكم سنة، لأ دول تلاتين
ارجع بيتك مرتاح ده الدار لسه دارك
ما تقلقش و خليك عارف - اللي بيحكم لسه مبارك.
