البحر زى الطيبين
سعيد شحاتة
******
البحر زى الطيبين فيّاض،
البحر زى الطيبين فيّاض ... وكاتم سرّ،
البحر زى الطيبين فيّاض . وكاتم سرّ. ومخاوى،
البحر ضحكة واد مغنّاوى،
البحر فرحة قلب برّاوى،
وأمواجه: رابطة ورد للغاوى وللحبّيب،
ومعافرته: تدريب على الترتيب،
وملامحه: ختم لبوسطجى المكاتيب،
وعيونه: جوز دباديب وغنّيوة وجع وبعاد،
البحر زاد لمحبتى وزوّاد،
وبلاد لا فيها غريب ولا محاسيب،
البحر مش تنهيدة الثوّار
ولا نار فى ساحة حضرة القباقيب،
البحر طيره وديب وتعويذه
ودموع عزيزه وقلب بكريزه،
البحر عود ياسمين وعود نعناع
وغيطان قصب
ومخالى خُبّيزه،
البحر طيره وديب وتعويذه وولد ونهار
البحر صوت وسكوت وزينه ودار،
البحر شارة حرب ع الدوّار و ع الساحه
على كلب ولف وكلبه نبّاحه،
البحر فرحة وش فلاحه ف جناين توت،
البحر توبه لبياعين الموت
البحر إيد نبوت وجميزه،
البحر طيره وديب وتعويذه ووجع ماريشال،
وعيال بتلعب ع السكك ويا العيال،
وجدع بيهرب
من سؤال المسكنه بصيغة سؤال،
وحبيبه واقفه
تبوس هدوم عيّل على شط الكنال،
وجمال بترمح فى المدى خلف الجمال،
وجبال بتخبط فى السما وتنطح جبال،
وتلال بتركب فوق تلال،
وخيال بياخد من خيال
مطلع قصيد مش محتمل،
البحر عمره ما كان محال
ولا كان أمل،
ولا عمره هيكون الكمال المكتمل
وسط الوشوش،
البحر حوش واسع
وراس لاسع
وقلب إن دخلّوه فى سباق
أكيد راح يطلع التاسع على التسعه،
البحر كان أصلا ...
حيطان عاليه وحيطان واطيه...
وقاعات واسعه ... وغناوى عبيط
البحر زيط ومعيط وستوته
وضفيره حلوه ووش بنّوته
وشويتين عنّاب وتعميرتين
وموغات
وحلبه
وشاى على النوته
البحر زى الطيبين مكبوت
والموجه ضحكه لبنت مكبوته
