الناس والشمس
شعر: محمد غندور
1
طلت شمس الدنيا
من شباك الناس
جت في عيون الليل
مسكت في خناق الخلق
شقت جلاليب النوم
وانتصرت
صحت يوم الكُسلاتي
بعتت صوتها يقول
خدي مني وهاتي
ودي ساعة صبحية
الناس عضلاتها مرخية
وشعور الشمس الدهبية
على كتف الشارع
والبيت
والغيط
والناس
2
وبنظرة من عين الشمس
لعيون النايم
ماقدرش يقاوم
صحى واتساوم
على ان الليل هيموت
.. مات الليل
صلوا على روحه الفجر
مشيت في جنازته كل الناس
ما أتشيعش بإسود
ولا بدموع وصويت
إتودع بالزغاريد
بالفاس
بالساقية والدراس
بالفكرة والكراس
قامت كل ضحايا الليل
بعد ما نامت عمدان النور
في ميدان الشمس
صحيت عين النايم
صحت إحساسي الهايم
بعد ما بصت ليها
عين الشمس
3
ضربة شمس
أو ضربة فاس
كلها بتهد الحيل
ترميك ع الأرض
تعبان ، همدان
عطشان ، وجعان
تاخد نفسك منك
هتموت م الجوع
ولا تسأل عنك
يبهت لون الدنيا ف وشك
لا تعرف إنه حبيبك أو بيغشك
يا ابن العم
إسمع كل كلام الدنيا
ما تردش
ولا تهتم
فكر مهما تفكر
لو حتى هتسكر
مش راح تعرف غير إنك
واخد ضربة شمس
4
زي ما طلعت .. رجعت
زي ما فرضت.. خضعت
إتغير لون اليوم
إغمق
والأصفر إزرق
ومقالشي : لأ
عايزين الحق
كان لونه جميل وحزين
الناس زعلانة
نزلت دمعة حزنانة
وجابوا له الشاي
غنوا له ع الناي
حتة منظر
تتحير لو
أقول إزاي !!؟
ــــــــــــــــــــــــــــــــــــ
مصدر : شعر العامية في دمياط ،
مديرية الثقافة بدمياط ، إصدارات الرواد 24 ، يناير 1990.
