لحظة واحدة شعر:محمد البرغوثي
لحظة واحدة
محمد البرغوثي
---------------
امسحي الروج خلِّيني ابوسك
بوسه واحده
حضن واحد
مرة واحدة ونفترق.
ماتخافيش.. هاقدر أسيبك
وامشي ويا الليل في حالي
قبل حتي ما نختلف .. أو نتفق
هامشي زي الطيف لوحدي
طير غريب .. من غير قرايب
طير مالهش حتي صاحب
زي معني بيتخلق
لحظة واحدة .. ويتخنق
مزلقان .. وزحام رهيب
الوشوش من غير ملامح
والعيون حَبّة حفر .
من زمان كان نفسي أشوفك
قبل ما انوي ع السفر
افردي حضنك ثواني ..
حسسيني لحظة واحدة ..
مرة واحدة..
شكله إيه .. معني السكن ؟
في الدماغ مقلب طنين
ضايعه فيه .. صورة وطن
افتحي صدرك ثواني وفرجيني
فرحيني بالفراغ
نفسي أموت في الحته دي
نفسي أنام من غير كفن !.
امسحي الروج خلِّيني ابوسك
بوسه واحده
حضن واحد
مرة واحدة ونفترق
قبل حتي ما نختلف .. أو نتفق
