مرار طافح
كلمات / ياسر العمورى
يعنى أيه مرار طافح ؟؟ !!
يعنى تروح تزرع الصحرا وتكافح !!
وتجمع كل حجر فيها !!
ورملتها تبتسملك وتصافح !!
وتسمع ضحكتها ويا الريح !!
وتفرح أنت بضحكتها ,,ولو قلبك جريح !!
تسرح فيها وبعلو صوتك تصيح
كانك فارس مغوار صحيح
..رافض الأزمة..رافض الزحمة
وتفكر الناس ب الصلاة والعمل
وتفكر الناس ب الصلا والأمل
وتتشعلق ف خيوط الفجر
وتزيح ضلمة الليل
-وتفتح صفحتك وتدوس
على الغدر وتشد الحيل
تصبر وتتعلم الصبر
ف عز الويل
وترسم الامل ف وش القمر
وترسمه غرة ف وش الخيل
لجل وطنك ما يميل ميل
وتحفر ف الصحرا بير
وتقاسى وتشرب المر
وتعافر وتمشى ف تعاتير
ومن خطر لأخطر وخطير
لجل ترفع راسك وتعيش حر ,
تسمع صوت المكن
وتشوف الميه بعد المحن
كأنها طبلة وزفة وزمارة
و عروسة إتحنت بمهارة ,
حلوة المية وطهارة
بس فيها شوية عكاره
إفرح ياجار إفرحى ياجاره
بجيب تقاوى قمح مختاره
من غير تفكير بروح واطير
زى حمام الجبل ’’ زى العصافير
وأزرع القمح ’’ بفن وتسطير
وأكون أنا الشاعر .. وأنا الزارع
وأنا الغفير .. وأنا الامير
وزرعى سجادة وحصير ..
تشوف القمح إتبسم ,, تتبسم وياه
وف عز ضحكة العيدان بالسنابل
يعطش ,, !! وما تلاقيش سولار !!
وتكون حبة القمح لسه جنين !!
تموت الحبة قدامك ,, وانت حزين !!
تروح تدور عربية ,, مفيش بنزين !!
تركب حمارة تعرج بيك
مفيش غيرها يوديك
تصعب عليك ,, تدور دوا ليها
وتلف ف المدن وحواريها
وتبص وتدور حواليك
ما تلاقيش دوا ليك
تسمع الحمارة تبكى عليك !!
تصرخ والزرع يصرخ حواليك
وتصرخ انت وتتألم ,,
وترجع وتتشعلق ف خيوط الفجر
وتزيح ضلمة الليل
-وتفتح صفحتك وتدوس
على الغدر وتشد الحيل
تصبر وتتعلم الصبر
ف عز الويل
وترسم الامل ف وش القمر
وترسمه غرة ف وش الخيل
لجل وطنك ما يميل ميل
لجل وطنك ما يميل ميل
