الغنــــــوة مصطفى بسيونى
(ومهاودك
ومهاود ريحك لو تتملى ف كفّي
ومهاود رمشك
لو هتجيني ف يوم تتشفي
ومطاوعك
ومطاوع موتي الجاي معاكي
أنا طيـــــــر مدبوح )
- الله ع الموت
بيخلّي قلوب الناس عاشقاني
مع إني أنا كنت إمبارح صاحي وكات كارهاني
هتعيّط نُص دقيقة عشاني ؟
وتطلع منديلك بشويش
وتنشّف دمعك برده عشاني ؟
وتبص يمين
وتبص شمال
وتقول سبحانه مُغيّر تلك الأحوال
وتبص لفوق ولتحت
وتبص يمينك من تاني ؟
طب أدي نُص دقيقة وعدت
طب والنص التاني ؟!
مناديلك غرقت ؟
ولا دموعك جفّت
ولا نويت تنساني
ولا معدش ف بُقك كلمة تقولها عشاني
معلش
ليك عذرك
أنا عارف إنّك مشغول
ووراك مليون مشوار
لزمن تخلص منهم قبل الليل ما يزول
بس أمانة عليك ما تطّول غيبتك عنّي
شهر .. اتنين
سنة .. سنتين
ابقى تعالى وزورني
راح أكون مستني
مش فارقة
ما أنا علطول مستني
وظيفة .. حبيبة .. اصحاب
26 سنة مستني
قطر استنيته كتير ومجاش
ويوم ما وصلني
خدته ف حضني ومُت
على فكرة
الدبلة ف صابعي لسه هناك على خط القطر
خدها ... أمانة عليك لتخدها وروح لحبيبتي
قولها إنها محلولة .. من كل وعودها
سلملي عليها
قولها وحشاني
أخبارِك ايه ؟
لسه بتاكلي رغيف العيش م النُص
لسه بتشربي كوباية الشاي السادة ف عزّ الليل
لسه دموعك زي اللولي لما بيضحك قلبك
بلّغها الحزن النازف من شراييني
وقولها آآآآآآآآآآآآآآسف
آخر غنوة كتبها لساني عشانك ماتت
لما لقيت القطر ف حضني
آسف
مقدرتش أكمّل مشواري معاكي
الموت ودّاني لأبعد بر
عاشقك
وبحبك
لآخـــــر لحظة ف (موتي)
هاتجيني ؟؟
هاستناك
بس أمانة عليك لتجيب طباشيرة معاك
واكتب بيها
مات امبارح
مات دلوقتي
مات بعدين
مات 16 شهر اتنين
مات علشان ميقولش هموت
ولا يعرفش ف يوم الكدب
مات إمبارح .. مات دلوقتي .. مات م الحب !!
