( نُصِّى التانى )
.
قلبى وطن
كل ما اتمركِز قوى
كل ما انفتحت بيبانه
وشبَكْ رُوحه ضَى مش عادى
فى حضرة ناس
ملمومه فى روحى..
بِتعزم الصبح ع العشا
كل أمّا تلم الشمس قمصانها المبلوله
وتسافر..,
عايش جاذبية كونى
يخطفنى اللى ورا حدودى تملّى..,
كأن هناك نُصًى التانى
وكأنك فارده دراعك..
عصافير
وبلاد..,
وشفق ..,وجنون
قلبى وطن..
وانتى السرّ اللى مخلّيه
رافض حتى سكونه,
جرَّبتى تفُكّى زَراير العتمة
وتشوفى كراسة رسم فى درج الوحده,
أنا قصة بتتلون
شكّلها الرَّاوى
ولاَّ مفاجأه..
مستنياها من أول حلقة..؟!
