كتاب الشعر | ما قاله العمدة في ساعة غضب | ماهر أبو غواش
القصة مش قصة علي بابا
ولا الاربعين حرامي
ولا قصة ليلى الحمرا
ولا حتى قيس وصاحبتو ليلى
القصة انو ما في خبز
عند المراة تتطعمي اولادها
وتنكة مي
وجرة غاز
تتطبخ حجار
تتنيم ولادها
وجوزها قاعد في زكمها
بدون شغل
وما معو سجاير
مع انو كان وهو شب
أحلى فدائي
والوالي
بطل يمرق من حد المخيم
وكل يوم بطير بموكب
بدعوس الناس
وبعمي الدنيا زمامير
وي وي وي وي
وقف على جنب
افتح الطريق
وي وي وي !
عشان ما حدا يفهمني غلط
أنا بس ساخن شوي
وممكن شارب شوي
وممكن كمان مرات بيجي عبالي
أبكي شوي
ومرات بيجي عبالي
أنجن شوي !
( ما قاله العمدة في ساعة غضب )
