بدون معاد
..
إتقابلنا بدون معاد
تاهت قلوبنا وسط زحمة المدينة
شفت في عنيها ساعتها
لهفة النظرة الحزينة
قالت فينك !
لسة فاكرني ولا نستيتني
أيه خلاك تبعد عني
وتاخد قلبي وتموتني
تعرف إنك كنت في قلبي حاجة كبيرة
جايز أكبر من تفكيرك
أنا عمري مافكرت في يوم
إن أنا ممكن أبقى لغيرك
2 ..
بصي في عيني شوفي ملامحك
مانعة عنيا تشوف الناس
بصي في قلبي شوفي دموعه
سرقت من نبضه الإحساس
لسه كلامك عايش فيا
لسه كلامي عمره ماخانك
لسه الفرحة مابتزورنيش
لسه محدش فيهم قادر يملى مكانك
3
كان ذنبي أيه
عشان توجعني بغايبك
وتنساني
ومن تاني
تسيب قلبي بيتعذب قصاد بابك
حلفت زمان على وجودك
فضلت أغني مع عودك
رسمت الحلم بوعودك
صحيت من حلمي قلبي حزين
غرق في دموعي حب سنين
وشوق وحنين
وكوم فساتين
وحضن وبيت
سرقت الفرحة ليه مني
وأيه ذنبي عشان حبيت !
