الشاعر اللى خان
___________
وكان له عين عصفور .. يغنى للخلاص
وعين رصاص
و وِش .. شمع
وجفن دمع
ورمش .. سل
وقلب مسقى غِل
وضحكتين .. بارود
وشفتين ورود
دبلانه من سنا
مسقيه إيه ؟ سم .. وغُنا
وكان له كف عاج
خنجر مصنفر .. سِنّه عاج
يتغز فى قلب الصديق
ويشق له فى الليل طريق
ويحل دم اخوانه فى الجرنان
ويبلغ السلطان
ويبيع شبابه بنص حزمه من ورق
وفى المسا .. ينعس على سرير العرق
ويمد ايده ع القلم
يكتب .. يبيع
يدبح بكفينه الربيع
ياكله الندم
تعمى العيون .. وتضلّم القناديل
وفى الصباح لقيوه قتيل
قال له القلم قبل النهار ما يبان
- يا ويله شاعر خان
يا ويله شاعر خان
ولقوا القلم مرشوق فى عينه اللى بتتمنى الخلاص
وكان له عين رصاص
وكان .. وكان .
زين العابدين فؤاد