باقولك أيه ..
ال " ... " بيشوف النشرة ؟
زينا عادي !
لا مش معقول
لو كان بيشوفها كان اتعصب وغضب علي طول
كان حرك في البحر الأسطول
ومسافة السكة بقي ف غزة
أنت بتحلقلي لمؤاخذة
ومقصك شارب أو مسطول
وأظن كمان ضارب كلة وقرص ترامادول
طب عيني ف عينك لو صادق
في لسة في الخزنة بنادق ؟
أطلع من دول
ال " ... " قلبه رقيق خالص جدع ابن حلال
لو شاف النار اللي ف غزة وجثث الأطفال
دا أقله أقله كان شمر دراعاته قوام
ولا كان حيصده ولا يرده معاهدة وسلام
أنا ظني مفيش عنده إذاعة ولا تليفزيون
ومتنساش برضه انه اتبرع بالكذا مليون
دي مؤامرة من الناس اللي وراه
صدقني انا عارف ندالتهم
ومفيش فيهم مؤمن بالله
يبقي الراجل واثق فيهم ياحول الله
أنما هم
سايبينه أكيد ماشي علي عماه
وانا م اللحظة دي حاكون جنبه وحاقف وياه
والله ان رسيت علي قهوة حاخده معايا
نتسلي لحد الساعة عشرة
ونقعد نتفرج ع النشرة
ويشوف بعنيه
مالك ؟ كدا ساكت ومسهم
أيه .. بتقول أيه ؟!
طب كنت ازغدني وصحيني
وصارحني وقوللي ان انا بحلم
