حِمل كتاف.. قصيدة من يسري زكي يسرى زكى
ما باحبش تبريقة نادية الجندي
ولا لهفة نظرات الناس قدام شبابيك التراخيص
ولا شكل الصبيان المساخيط في التوكتوك
ولا هَلَع الميكروباصات في الشارع
قبل مغارب رمضان
ولا جثث الخلق المدفونة ف آخر الأتوبيس
ولا شكل الكناس اللي بيشحت بالبدلة الزرقا على الكوبري
والذل اللي بيكنس أثر البني أدميين في الشارع
وبيمسح وصف البني أدميين في عينيه
ما باحبش شكل الكوبري الزحمة
اللي العمر اتسرسب مني عليه
ما باحبش وش الراجل اللي زَرَعتُه ف أرضى وخَضَّر
فَقَلَعنِي وطَوَّحني في المجهول
ما باحبش نظرات الغدر
ولا وجع الناس الواقفة طابور
ولا شكل الأستاذ اللي ضربني ف إعدادي
والصول اللي شتمني في المركز
والعبد اللي بيفضل دايمًا عبد ومأمور
ما باحبش شكل عيون المجهول المِدَّاري ورا السور
ولا شكل اللُّمَضِ المطفيَّة ف عمدان النور
ما باحبش إحساسي بالغربة ف بلدي
ولا إحساسي بالموت وانا حي تحت العَلَم المرفوع
ما باحبش اشوفِ اكْوام الشنط السودا الشبعانة زبالة
المرمية على الأسفلت بتنزف جوع
والصوت العالي اللي بيصرخ
من جوا سكوت الناس صرخة موجوع
ما باحبش شكل الناس الباقيين في الشارع من عاد وثمود
ما باحبش وش الزمن القاعد مستني في موقف عبود
ما باحبش شكلي ف تبريري
وانا ماشي مخالف لضميري
وباحس ان انا واحد غيري، وانا مش موجود
أنا مرهق جدا
من كتر التفاصيل اللي ما حبيتهاش في الدنيا
أنا متعذب جدا
من كتر المسامير اللي انا دست عليها وانا حافي
والمشاوير اللي انا رايح جاي باَمْشِيها
والحمل دا كله على كتافي.
من ديوانه " باعيش عجوز وباموت صبي" الصادر عن ديوان الشعر العامي ، الهيئة المصرية العامة للكتاب.
